《 Adolescence 》這部劇集讓人震驚之餘，也引起不少家長新的疑問：英國的教育體系是否真如劇中那樣失控？孩子是否只能靠運氣獲得好教育？
畢竟，不少香港家庭選擇將子女送往英國升學，期望他們能夠衝上牛津或劍橋。然而，階級、學校資源、文化背景是否已經決定了一切？
這部劇的少年主角Jamie來自一個普通家庭，成績不差，家庭看似和諧，卻仍陷入悲劇。他的遭遇不單是一個家庭的悲劇，更是一面鏡子，讓家長朋友好好自省。
在英國，教育體系可粗略劃分為兩大陣營：政府資助的公立學校（State Schools）與需繳學費的私立學校（Independent Schools）。劇中的學校雖未明言背景，但從地點、角色口音及拍攝地可推斷其為一所位於英國北部、資源相對有限的公立學校。
赴英升學的香港學生，有一定經濟能力的家庭一般都會選擇私立學校。事實上，兩者的學習環境、氛圍形成鮮明對比。
私立學校不單止面積大，更擁有更好的教學資源、較低的師生比例，亦有嚴格校規、師資與更完善的寄宿學生管理制度。某些寄宿學校甚至禁止學生於教學時間內使用手機，強調專注與人際互動。例如Old Buckenham Hall School實行全日禁機政策，學生與家長的聯絡需透過校方電話，目的在於讓孩子重新與現實世界建立連結。
一竹篙揇沉一船人？當然英國也有很多優質的公立學校，尤其是Grammar School 也誕生過很多人才。不過要考入Grammar School的確不是容易的事，需要過五關斬六將，競爭不比入香港名校低。想躋身靚校網區，家長亦需要事先張羅置業，準確計算Catchment Area，以順利考入校風好、成績好的公立學校。
只有公立學校才會發生那麼恐怖的事嗎？一套10年前、我很喜歡的電影《Riot Club》。主角為牛津大學一年級生，富二代、讀寄宿學校，進入了Riot Club，一個相信金錢為萬能的組織，在電影內做盡無人性的壞事，用階級身份互相欺凌，最後互相推卸責任，無視社會規範地任性妄為。雖然不是真實改編，但故事想你知：即使頂級名牌學府，同樣會出現價值觀扭曲的高材生。
至於讀公立學校的基層學生係咪就冇得入牛津劍橋呢？咁又唔係。英國早在1944年就由上議院通過咗一條教育法，講到明不能夠以階級背景成為牛津劍橋取錄嘅當然標準。因為英國政府知道，戰後生長嘅一代喺唔同環境長大，政府有社會福利，英國冇可能返去維多利亞時代，由貴族精英壟斷牛津劍橋學額。
不過這條法例有幾十年都唔係執行得咁透徹，直到千禧之後，工黨政府同自由民主黨在國會聲勢浩大，英國經濟又出現進一步的貧富懸殊，於是牛津劍橋改變策略。牛津大學2022年度由政府公立中學取錄的學生已經高達68%，另外三分之一先至取錄自寄宿學校。
所以，今日去到牛津劍橋，見到啲學生走落街，同樣係踩緊單車，講嘢就聲大大，外表冇咗以前嗰隻皇室貴族氣質。咁樣係好事定壞事呢？當然視乎觀點與角度。
但牛津劍橋強調：無論學生來自邊類中學，學業考試成績優秀嘅取錄標準係唔會變嘅。第二就係personal statement點寫，同埋面試嘅表現。換句話說，你成績未達標的話，一律免問。
喺呢方面，我嘅朋友Calvin Chan喺牛津讀緊哲學博士，兼做埋新生取錄嘅口試委員會委員，佢有好多經驗心得，透過我哋2月舉辦嘅教育講座講晒俾家長聽。而結合Calvin講以及我哋嘅經驗，牛津劍橋學生仲有第三條標準，就係Extracurricular Activities。唔單止課外活動體育音樂咁簡單，而係Consider埋學生的家庭背景。
例如個學生來自英國北部，唔好彩投胎生於一個好似套劇集裏面老竇揸架貨車專門同人清潔廁所的工人家庭，但係自己好爭氣讀書，不但成績好，而且課餘仲有參與一啲幫助其他貧窮家庭小朋友、補習、或者社工嘅工作，包括週末協助council分派食物，對貧苦大眾嘅社會現實有認識。咁樣嘅生活經驗，隨時會好過在香港考咗九級鋼琴。
近年公立學校的取錄比例增加，其實係計埋第二和第三因素。
香港家長有好多未必有足夠嘅經濟能力，供個細路由小學就去英國開始讀寄宿學校。好多BNO家長都有搵我幫手，亦識得挑選優秀嘅Grammar School，不但學費全免，只交少少住宿費，而且家長去埋學校附近置業，仲可以讀日校。不過就要記住要鼓勵個仔女Reach out去個社區，唔好放學返嚟就困住喺個房度做功課同埋打機，慢慢個細路會融入居住地。
不少香港家庭以BNO身份前往英國，期望子女能以較低成本入讀公立學校，然後申請牛津劍橋。然而，選校策略與學生適應能力往往才是關鍵。
首先，很多家長誤以為讀公立學校就自動「加分」，但若學生來自富裕背景、居住於倫敦周邊、擁有高資源支援，錄取時並不會被視為「弱勢」。牛津劍橋的錄取制度會考慮整體背景，而非單一學校類型。
其次，香港學生習慣應試文化，偏向被動學習，對討論式教學與小班互動感到陌生。牛津與劍橋重視學生的主動性與批判性思考，若學生在面試中缺乏交際能力或無法清晰表達觀點，即使成績優異也可能落選。當然，好老土講句，考唔入牛津唔代表你矮人一截，只是你不適合。
拉得太遠，講返套戲《Adolescence》留下一個沒有答案的複雜命題，當中值得家長朋友反思。劇集沒有作出批判或定案，卻逼使觀眾正視那些孕育暴力的社會，同時提醒我們：升學路上並非只有一條路。牛津與劍橋固然令人嚮往，但若學生無法適應其學術與社交要求，勉強躋身反而可能成為另一種壓力。
教育不是單純的「鋪路」，而是在過程中幫助孩子建立信念、價值與方向。如果我們只看重結果，而忽視過程中的陪伴與成長，那麼無論孩子身在倫敦、劍橋或香港，最終都可能迷失於一條名為「成功」的單行道上。