Samuel Chan 談英國 By Samuel Chan
2016-12-26
Chinatown的美麗陷阱?

思鄉病。叻的英國留學生,不一定會有homesickness,因為適應力強,好快群到鬼仔玩。不過就算留學生幾有grit,一提起香港美食,叉飯、雲吞河、譚仔、西多、媽咪靚湯,留學生都難免心有戚戚然,想喊出嚟。

 

三五香港同學群埋一齊時,總會喜歡傾下大家在香港時的生活。往往在這時候就有個講起香港美食,其他人就會附和說「不如weekend去London Chinatown食野吖!」

 

有去過Chinatown搵食的你,都會明白走過大街小巷,總會見到一些好Tempting的名字,但原來都是「標題黨」:小洪樓(英文叫Little Hong Kong)、九龍酒樓、新龍鳳大酒樓、喜洋洋中餐館之類的lame爆名字。

小洪樓 Little Hong Kong (圖片:tripadvisor.co.uk)

 

然後就出事了。十一二鎊一位的all you can eat自助餐,配上每家「中菜館」都有的sweet and sour pork,spring row,炸冬菇,雞翼等九唔撘八的中菜,都是Chinatown中菜館的常見畫面。然後你探頭看看四周的食客,十居其九都是食得津津有味的鬼佬,你會慨嘆,又啱嘅,幾奇怪都好過餐餐食麵包薯仔……

中菜館任食自助餐 (圖片:hongkongbuffet.org.uk)

 

還未夠說服你嗎?上一上Trip Advisor,睇睇Chinatown的餐廳review。你就知道,所謂的「香港餐廳」,只是掛香港的名字來氹遊客落撘的tourist spot。

 

不緊要,你還有文興嘛!對的,之前提過的文興,撇開是不是正宗香港風味不說,味道卻是最好。皮脆肉嫩的烤鴨連我這位小欖仔都爲之瘋狂,螞蟻上樹爽口香辣,配飯一流。飲飽食醉,盛惠九十鎊。唔貴!香港味道嘛,唔貴,唔貴……

文興酒家 (圖片:timeout.com)

 

如果你像我一樣,經濟上無法餐餐去文興,食到御用飯堂咁,那麼Chinatown的港式士多仔就是留學生的聖地。各式各樣的合味道、出前一丁、熊仔餅、李錦記,仲有仲有……各位觀眾!熱!浪!

 

最感動的,是價錢合理,杯麵都是七、八十pence一杯。不過,這種true Hong Kong taste,就算五鎊你都會捨得買。而每次見到合味道,我都一定會買多幾杯,送俾食神George,話佢知,傳承香港飲食界的驕傲。

Chinatown小店 (圖片:flickr.com)

 

我明白,我真係明。就算Chinatown中菜幾有伏味,自助餐幾九唔撘八,我間中都會幫襯。不是為了食餐好的,只是每次食完,都總會再次懷念香港有幾好。或者,Chinatown就是我們這種番書仔最好的美沙酮。

 

圖片:lls1996.com

文章作者為英識教育Britannia StudyLink創辦人陳思銘Samuel Chan。

關於作者