剛獲陶傑認證嘅「香港新四大才子」：葉朗程、林作、「光明頂姜濤」馮智政及鍾培生，近排鍾培言論非常惹火，呼籲「嗰啲18蚊窮遊嚟香港就唔好嚟啦，可以留喺內地，好好生活」，而引起內地熱烈議論。
Derek又建議政府，內地小紅書「兩餸飯窮遊」來香港，應該同時出示香港住酒店Booking通知，同埋銀行資本證明，證明來到香港之後唔會霸住麥當勞通宵免費瞓覺，亂拋垃圾，增加香港基層清潔工友負擔。Derek名言：「香港向來係一線城市，出名貴，如果嫌香港物價消費成本高，就唔好嚟。」
Derek咁講，好有性格，針對內地近年來消費力退步、但係又慕名香港東方「豬豬」呢個世界名牌國際貿易都會到此一遊嘅國內青年旅客，本來係講老實說話、善意提醒，不過就可能令到佢哋少數人覺得有少少hurt。
鍾培生事件，我覺得帶出咗一個同留學英國都幾有關聯嘅心理問題。
中港好多家長，好急切咁送仔女去英國讀寄宿學校。而佢哋心目中嘅名校，唔係聽慣聽熟嘅Eton ，就係Winchester，或者Wellington 、Cheltenham Ladies呀咁，因為呢啲一線大型英國級寄宿名校早已經打出國際，喺中東或者泰國都有分校。喺香港， Harrow國際開喺青山屯門，一度幾百萬Debenture，令到家長覺得呢幾間就係英國中學嘅Hermès同埋CHANEL。
本來直到前幾年，中港同埋全球經濟好景，英國寄宿學校嘅名校亦越來越多為人所知：Oundle、Uppingham、Radley、 Repton等等，間間報名都逼到爆，卸咗頭幾間嘅收生壓力。
點知自從COVID以來，英國寄宿學校業務開始困難。尤其係工黨上台，增設英國私立學校增值稅（即係VAT）高達兩成。工黨政府係一班社會主義者，主張教育平等理想，認為寄宿學校只係為有錢的家長學生而設，教育資源分配不足，於是就有啲仇富兼眼紅。
英國嘅中產階級越嚟越窮，雖然本地家庭眼見公立學校質素偏低，死慳死抵供養仔女入讀寄宿私校，但絕大部分只能夠每日走讀，留低好多位，本來有歐洲甚至遠東嘅學生補上，但因為政治理由，俄羅斯及中國內地嘅學生近年大幅減少，英國的寄宿學校就迎來一場小型屠殺。
COVID結束之後，短短兩三年，已經有超過30間私立寄宿學校要結束，其中好多係歷史悠久嘅名校，包括Queen Margaret’s School for Girls，特別令人惋惜。呢間名校雖然學生人數只有二百幾，亦因為唔夠大，香港學生好少報名，不過我識得嘅幾位女性朋友都係呢間學校嘅校友，一個入咗LSE，一個去咗美國讀PennU。佢哋畢咗業冇幾年，聽見英國的母校要倒閉，當堂好似聽到媽咪病逝咁，樹欲靜而風不息，哭泣成聲。
仲有一間Royal School，在Surrey，學生人數190人，1840年創校，2019年已經經營困難，獲得注資一千六百萬英鎊，但都捱唔到今日，宣布今年8月31號結束。另外仲有幾間掙扎緊，雖然未曾完全關閉，但小學、幼稚園等分階段停辦。
呢件事令到我同埋好多英國畢業的同學仔好有感觸。
英國寄宿學校不一定越大越好，相反較細，學生得到嘅關懷反而更多。不但學校有小班教學，而且一個宿舍學生少，五六個學生就得到一個舍監照顧，House Master同每一個細路一齊起居飲食，照顧生活，關係已經唔係舍監與寄宿生咁簡單，而係情同契爺契仔。
香港已故戲劇大師古天農個仔Justin曾就讀英國Monkton Combe中學。相信呢間學校嘅名，好多家長未聽過。學校在Bath附近，學生只有三百。
Justin喺嗰度讀書，成績當然唔錯，但都仲未係最標青。喺A-Level第一年，佢準備報大學，冇諗住報讀牛劍。有一日，佢教數學科嘅阿Sir突然間問佢：你諗住報邊間大學？
當知道Justin嘅大學選擇好謙虛咁唔包括Oxbridge，個阿sir即刻約佢傾偈，話佢聽：我認為你有報讀牛津大學嘅潛質，你唔應該唔報Oxford。
Justin問：阿sir，我好有自知之明，我唔得㗎。
正當Justin仲有啲遲疑謙讓嘅時候，咄咄逼人嘅阿Sir話：你得嘅。你唯一嘅hurdle係你自己。呢個週末你得唔得閒？我可以揸架車車你去Oxford睇一睇環境。
Bath同Oxford之間嘅距離，揸車要三個幾鐘頭。於是，這位老師就用週末自己嘅私人時間特登約Justin一齊去牛津，參觀咗機械工程最出名嘅一兩間學院，帶佢行勻全城，話俾佢聽Oxford大學嘅文化係乜嘢，喺呢度讀書有乜嘢好處，包括唔好以為見到啲宿舍好舊，但呢度出過幾多個猛人⋯⋯
即日來回，令到Justin convince到自信，於是佢就聽老師話，將牛津列為UCAS報名表嘅第一位。
結果？結果就係經過面試同A-Level放榜之後，Justin獲得牛津取錄讀電子工程，畢業後在倫敦搵到的第一份工，年薪十萬鎊。後來因為佢對戲劇嘅興趣更大，先至棄暗投明，放棄牛津，返來香港。
希望Justin唔介意我分享呢個例子。相信到今日佢仍然懷念同埋感謝嗰間在鄉村山林之中、對於香港九龍塘同埋山頂嘅家長屬於寂寂無名嘅小型寄宿母校。
唔好信晒Donald Trump，不一定Big and Beautiful，英國寄宿學校More and Most Beautiful嘅學校可能反而好细間。Small is more beautiful, and large souls always come from small schools.
記住，報讀一間細而且比較偏僻的英國寄宿學校，絕對唔等於18蚊窮遊香港幫襯兩餸飯。人生嘅Banquet，豐盛的收穫在後頭。