銅鑼灣返工，尤其是時代、禮頓中心那邊的，簡直是身處食lunch的天堂。當你那位老死Jacob在科學園叫哂救命大呻美食沙漠，或者巴打Kenneth在Elements返工日日都要捱貴飯食連鎖店時，銅鑼灣人煩惱的，就只係今日食邊日本野還是越南野，食完野去Habitu買咖啡，還是去Coffee Academics嘆杯Latte。
正因為餐廳種類同數目都多到嚇死人，同事們食lunch地點的傾向，可以反映他們是何種人：
1.淑女派
一間公司，總有幾個淑女同事，說話elegant有氣質，十有八九是外國讀完書的番書妹，家境和生活質素都唔錯。一到lunchtime，他們第一時間想起Midtown的Wooloomooloo。重點並不是那塊牛扒或者露筍煎帆立貝，而是襯海鮮的white wine和餐後的desert。
心血來潮，有時也會去遠少少的名店坊Elephant Grounds，那裡的咖啡特別滑，奶味特別香。她們還不時會慷慨買Lady M蛋糕給同事吃，而你望住眼前那碗兜在Jason’s買的沙律，想起昨晚男友Eric笑你肥，你就好怨恨點解呢班淑女食極都唔肥。
2.地區食家
第二種，是住在港島區或者銅鑼灣天后一帶的地區食家。這些人在同區打滾了十幾廿年，你最好不要和他們講食經，因為一講，佢地仲長氣過你老細開公司例會。
例如他們會話食米線不要去譚仔，登龍街金西南撈米線仲正；食日本野，大戶屋貴夾唔抵，不如去對面小平津；車仔麵要去糖街的榮記，灣仔那家唔好食。記得要食雞翼尖，仲一定要takeaway，如果唔係唔好話自己識食車仔麵。
3.實幹型
第三種，是實幹型的同事。公司種有一種人，lunch time時好少見到佢地，因為成日忙到飯都唔得閒食。他們會等同事們先食完lunch，自己再落街買個新記、得記兄弟，甚至買個麥記餐就算，順便落街行個圈抖下氣。
佢地對食野無乜要求，但求填飽個肚就繼續返位send email同埋俾老細捽。這種實幹型同事默默苦幹，可能有車要供、有樓要供，寧願食少餐飯繼續做，但求年尾埋數前做多兩個客，分多幾千蚊bonus奶粉錢，返到屋企同隻河東獅有個交待。
其實仲有一種，就係日日帶飯返公司食的健康打工仔。每次當你想撩佢去lunch，佢就會禮貌婉拒：「唔啦，我帶咗飯，你地食吖。」雖然你明知佢日日都係咁，但都仲好想撩佢，搏下有邊日佢會無帶飯，或者係棄飯陪同事們出街食。
然後你終於有一日約到佢去食，而咁啱實幹型的經理又爆哂數可以chill下，淑女派的靚女秘書Yoyo就會話：「不如去Time Square鍾廚食吖！嗰度啲鐵觀音好飲，我依家打去book位！」全公司到齊，連去開足球會同名人食飯的大老板，都客串出場幫手埋單。
無論你公司有幾多種人，幾多種食lunch的文化，同事總會在call馬team lunch的時候到齊。這就叫做team spirit。
P.S. 內容純屬個人意見，歡迎交流。
圖片：F-Production