好多人都覺得中國人迷信，但講真英國人迷信嘅程度絕對可以媲美中國，尤其留學生去到外國，一唔小心好易踩中地雷。之前《英國古怪命名學》提過英國人視「13」為不祥數字，今次同大家數數五個英國人嘅迷信思想，睇下大家會唔會唔小心犯禁？
1) 打乞嗤會靈魂出竅
(tumblr.com)
初初去到英國讀書，有時打乞嗤隔離英國同學會講句「Bless you」。開頭唔係好明咩意思，以為係禮貌上講句說話祝人早日康復。但其實呢句「Bless you」係基於英國一個古代嘅奇怪迷信思想。佢哋覺得打乞嗤太大力會令靈魂出竅，撒旦就會借機將靈魂吸走（會否誇張咗啲……）。所以Bless you呢句說話係希望保佑果個人嘅靈魂，趕走惡魔。所以某程度上Bless you有啲似Expecto Petrolum，即係Harry果句護法咒。
2) 打爛鏡，七年運濟
(2tout2rien.fr)
去到英國要小心handle鏡呢類物品，因為當地人相信打爛鏡會行七年衰運……點解？不少British認為鏡係通往其他平行時空嘅通道，打爛鏡等同將自己另一世界嘅分身扭曲，影響自己行衰運。有啲比較迷信嘅老一輩會喺小朋友剛出世時包好屋企所有鏡，以防小朋友嘅靈魂誤闖其他世界。（其實幾詭秘）同古代中國人以為影相會攝走靈魂呢類講法有啲相似。
3) 室內開遮會撞鬼
(tumblr.com)
英國出名長期天陰陰，所以佢哋其中一個迷信思想都同擔遮有關。British同中國人一樣，覺得室內開遮會撞鬼。其實無人深究過點解開遮會撞鬼，不過我之前試過問local同學，最後得出一個比較合理嘅解釋，就係早期嘅雨傘用料較粗糙同比較難開，喺室內開遮容易整傷其他人或者打爛傢俬。唔……有趣有趣。
4) 擺新鞋喺枱面會行衰運
(thechive.com)
英國人唔會將自己對鞋放喺枱面，尤其係新買嘅鞋。除咗唔想整污糟張枱，其實仲有段故。根據19世紀英國北部礦工嘅傳統，如果有人因工死亡，其他礦工會將佢嘅鞋放喺枱面，間接向佢嘅屋企人傳達死訊。所以英國人開始覺得放自己對鞋喺枱面唔吉利，仲可能會招致死亡。如果你買咗對新鞋返宿舍，記住記住唔好放喺枱面，小心同roommate反面。
5) 千祈唔好喺梯下面行
(rediff.com)
如果你喺英國見到有條靠牆嘅長梯，應該好少有人穿過條梯下面行，因為英國人相信咁做會bad luck。佢哋認為此舉等同褻瀆神靈，因為木梯同牆之間嘅三角形令人聯想到天主教嘅聖三，所以breaking the triangle係不敬，會有不祥後果。不過老實講，咁樣喺梯下面穿過都幾危險。個人覺得人身安全比較合理。
其實大家接觸新環境，入鄉隨俗非常緊要，因為每個國家都有自己一套禁忌或者迷信思想，好多時都係衰過先知，真係要小心處理。不過下次見到英國人，大家識做啦。