日本放題。好似幾年前開始興起，即是日式自助餐 All you can eat。不用走來走去攞野食，剔紙仔搞掂，所以嚴格說不算自助餐，是自助點餐。
放題一出，莫講話勁鍾意日本野的港女流哂口水，我身為男士都like爆。It’s always good to have options，我好怕揀，有選擇困難。
次次食野，尤其日本野，都諗：食刺身定食跟碗飯好定係壽司定食配烏冬？諗諗下過咗十分鐘，店員怒啤。
放題就解決了所有問題。一大疊紙任你剔，想食乜就剔乜，何其奔放！直到一次，朋友介紹一間位於尖沙咀加連威老道的日式放題，大開眼界。
就算book好枱都要排隊入場，分早晚兩個時段，店員幫手店名點人數。一夠鐘大舉入閘坐低。開始計時，90分鐘大家麻煩準時。一坐低各位食客好像馬迷一樣雞手鴨腳不停填紙填紙填紙剔剔剔，唔怕你食唔哂，最驚你唔敢嗌。不消兩三分鐘開始上菜，快到你唔信。
食物質素。係好食，新鮮，員工們手腳快，抵讚。幫忙影合照永無甩拖，掂。然後笑聲笑聲中九十分鐘迅速過去，埋單部隊們衝出來提醒各位差唔多夠鐘，「先生仲有15分鐘交枱，依家last order請問仲有無咩未上？」哦，無喇，唔該哂，埋埋張單吖唔該。
一餐既飽肚又美味的日式放題在笑聲和一句二句「好飽呀」中落幕。不過我好唔滿足，點解呢？
I hardly recognise what I have just stuffed into my throat. 由入場到坐低，由點菜到上菜，basically 由入嚟到食飽，全程都好似快餐。香港食客們都好配合，極速落單，野食速速清，一輪又一輪，好似賽車跑到咁上下入pit換軚再跑過一樣。
香港人好快，快係好事，but even for 放題，就太快。即使你真係好肚餓，或者lunch time得20分鐘食完飯仲要學特首咁去游個快水，食的時候，都應該稍為放慢自己的速度。試試由開到150km/h的法拉利放慢到15km/h的老爺車，享受一下沿途風景，享受一下美食為你帶來那刺激的五感。
那種快如閃電的放題速度好像太沒感情，莫講日本人那種食客與廚師透過品嚐食物的mutual respect，快餐式放題就連我食咗啲乜野入口都未必看得清。
香港人，試試放慢腳步，Don’t Miss Your Life.
圖片：Yahoo! Hong Kong