最近在網上看見一篇文章名為《英國人的健談，令我這個港豬很不知所措》，我不禁笑了，因為英國人的對答方式真的很過癮，勾起了不少我在英國時的回憶。
香港人，電話聲響，第一句：「喂？」「喂Samuel呀，今晚book咗7點半尖東乜乜乜餐廳食飯，到時見拜拜。」啪！嘟…嘟…嘟…直接切入話題，沒浪費時間，沒半點口水，一句到題。
英國人：「Hello Samuel how was your weekend?」「Great, thank you! And your’s?」「Not too bad, not too bad, the weather is obviously awful but… (下刪300字) Oh Samuel I booked a table tonight at 7pm…」英國人的weekend真的好精彩，無論幾忙幾趕，他們都一定先跟你閒聊一輪才入正題，而差不多所有英國人都鍾意講天氣，好像天氣先生上身，評一論落大雨吹大風大雪有陽光。Hello完就直接入題反而有點rude。
而英國人說話比較正面，good的同義詞多到飛起。Fantastic! Brilliant! Excellent! Splendid! Marvellous! Fabulous! Spiffing! Top Notch! 而在電話討論的話題中都不時會讚美別人，或是別人提出的意見。
香港人呢？好！好好！非常好！勁好！講來講去幾句。講電話時更加不會突然讚對方，同你好熟？無啦啦讚我？
英國人說話有一種特色，是很會顧及聆聽者的感受，我和陶傑都認同。想話一個人蠢，不聰明，英國人不會說「He is stupid.」，反而可能會說「I am afriad he may not be the brightest.」換成中文則是將「佢好蠢」說成「佢可能未必係最聰明嗰個」，哈哈，聽落好奇怪吧？
Let’s not take it personal. 就算不話人蠢，話人的意見不好，英國人都有一套說法。「Your idea is bad」除而代之，是「That is an interesting idea, but we could look at it this way….」中文大約是：「你的提議相當有趣，但我們亦可從另一個角度看…」有點像勉強翻譯的電影字幕。
香港人要鬧人，都不會轉彎抹角，即使裝作低調鬧人，其實都是轉個彎抽水。「你做野好有問題囉」「好蠢囉佢」「其實你有冇諗過出門口返工前睇下帶咗個腦未先？」
忽發奇想，如果將英國人的談吐抄過來，可能會有以下效果…
「喂你好呀Samuel！你嘅週末過得好嘛？我上星期同屋企人去咗行山，風景靚到無與倫比，簡直係完美無瑕！個天藍到神奇頂級超卓！係呢，上次同Peter開完會，佢提出咗一啲好有趣嘅意見，不過我就會從第二個角度去睇…有時候我都覺得Peter個水平未必係全team入面高嗰啲。
係喎，今晚我訂咗枱去尖東食飯，七點半，間餐廳啲野食好食到頂點！環境優美到仙境一樣！服務直頭係米芝連級嘅優秀！裝修亦都係富麗堂皇！真係令我非常之極度嘅萬分期待！好啦，今晚見，祝你有個美妙、愉快、豐盛、奇妙、美滿、嘅下午！再見！」
語言是反映地方文化的一大元素。香港人比較重效率，講說話要快狠準，而英國人則著重人與人之間的聯繫，未到重點都先花時間互相了解。其實說話風格沒有絕對的對或錯，只有最舒服最適合自己的。最重要，無論任何語言任何背景，都要記住「慎言」二字。話說出口，覆水難收，言者無心，聽者有意，這種學問，花上一生都要學。
圖片：網上圖片