老死兼合作伙伴Juno單身了半年，日日Whatsapp我唱容祖兒的怨婦情歌，甚麼「誰來愛我，小心愛錯」、「何以我變了你的十六號愛人」，男人老狗真係頂佢唔順。
早兩星期，Juno脫離單身，係咁同我講濟公好掂好勁，求完籤即刻有拖拍，不停說服我一起去還神順便求姻緣。雖然我對求神問卜不太相信，不過口裡說不，鼻子好誠實，聞到Alfred車上由一陣陣男人臭汗酸縮味變成Miss Dior的Blooming Bonquet味，就心郁郁。
我走到貌似劉江的師父前面，半信半疑坐下。「師父呀，我想求…」我細細聲話。「求姻緣吖嘛，唔使講啦，一睇就知單身咗好耐。咩名呀？」話口未完，師父開始嚟料。
「陳思銘。」
「哦！陳思銘求姻緣下嘛！使咩咁細聲呀，求個籤都怕醜？」師父帶我到一旁，例行公事搖一搖籤筒。「卜通！」二十二，三十七。
「嗱，二十二上籤，事業方面唔使擔心。籤文話你好有理想，高瞻遠足，有貴人相助。『飛騰八翼已生成』，飛都飛得快過人遠過人。」嘩，不得了，各位同學仔搵我報學校可以放心，連濟公都讚好。
「不過呢，三十七號姻緣就下下籤。」
「『波心休去撈明月』，唔使諗拍拖啦，最少半年都係單身。」咁約異性朋友出下街食飯呢？「唔得呀唔得呀，呢段時間你身邊嘅女仔唔會係對你真心。所謂襄王有心神女無夢，你唔好咁多幻想，死纏難打隨時俾人玩返轉頭。」身邊的Juno已經笑到收唔到聲，而我則臉如死灰。
身邊好友、工作伙伴、同事等等，一知道我事業上籤都好開心，「公司生意靠哂你」、「年尾份花紅Fat Fat喇」之類的說話不絕於耳。反而姻緣的下下籤，卻只有我媽和阿公最緊張。
兩老催婚催得最勁，怕我醉心工作到三四十歲還是一枝公。我明，廿八九適齡結婚，老人家都恨抱孫，我實在應該孝順。如今濟公一箭穿我心，我只可安慰一句「求籤嘅野，信則有不信則無，我會努力。」
信則有不信則無？突然驚醒，其實我一路都唔係咁信求籤。神奇的是，當你走入了廟宇，一枝籤，將當初人定勝天的堅持全都沖洗去。