PM

UK chitchat

article-no380

記得Samuel Chan 談英國專頁上年十一月正式開始,初初由文筆好差,錯別字勁多,寫下寫下到今日有讀者回應,同我有共鳴,一齊傾一齊分享。差不多七個月時間由十個人左右like,行到今日一萬like,條路唔易行,多謝各位支持。

 

而七個月之間,令我最開心的一件事,是收到讀者PM。好難得,真係好難得。如果讀者們你地有自己開page寫野經驗的,會好明白,寫文無人like同like完無人comment無人PM一樣咁唔開心。

 

係咪我寫得好差?係咪全部都係朋友仔俾面like?到底大家點諗我嘅文章?我好貪心,除咗likes,我仲想聽到你地嘅意見,鬧又好讚又好,我想從每一個留言每一句說話中學習。

 

「Samuel你好似寫錯字,應該係驟眼唔係聚眼。」我的第一個PM,好開心。就算係簡單一句,第一個PM令我感受到自己的文字有人記得,係存在感的一種體現。雖然唔係大作家大文豪,但第一次真正感受到同讀者交流係乜野一回事。「種感覺好正,好似寫十萬封情信俾心上人,佢第一次reply你。就算一句『noted with thanks』也好,嗰晚你都瞓唔著。」Marcus咁講過,師父,明白了。

 

就好似細個時候會嫌阿媽好煩成日話你呢樣話你嗰樣,到依家,想搵個人俾下comment,討論下你嘅意見時,你就會發現,肯講出一句說話嘅人,係證明佢重視你,緊張你,你喺佢心目中有一種地位。

 

慢慢,我收到越嚟越多PM,有人問我升學意見,有人邀請我去茶會,有人想合作,有人純粹鬧我文筆差,亦有人讚我啲文唔錯。

 

做人就係咁。拋個身出嚟寫文,預咗有人讚有人彈。如果你仲係學生,仲有錯的本錢,即管學習一下開心見誠聽人地意見。讚你的,要繼續維持做,鬧你的,要好好想想自己有無錯,有無改善嘅地方。善意提醒,要心存感激,至少有人肯徙口水話你聽。長大後,成人未必再會提點你,「做乜要教精你?」,未必再有人肯為你的文字,為你的一字一句發聲。

 

P.S.繼續歡迎PM歡迎留言,每一個,literally每一個我都會睇。

您可能感興趣的文章