1. 八、九十年代英國的寄宿學校香港人不多,幾乎全部也是鬼仔,可能你已是成間學校唯一一個香港人。遇到個香港人真係開心都不得了,直頭好似中六合彩一樣咁開心。
2. 早期的boarding school大家要一齊瞓dorm,試過16個人瞓喺一間房,夜晚嗰陣啲鼻鼾聲非常惡頂,高中低音樣樣齊,仿如一首環迴立體聲的奏鳴曲。今日的寄宿學校私隱度較高,十年級的學生會分派去較cosy的四人房。
3. 寄宿學校舊式的沖涼房是communal shower,即係一大班男仔除晒啲衫,肉帛相見,一齊用花灑沖涼。好在我當年讀小學,大家都未發育,個對比無咁 embarassing,我講緊高度。九十年代初,學校逐漸以間隔式的shower room取代communal shower。
4. 最慘是熱水供應非常不穩定,時凍時熱,簡直是冰火交融。更慘係天寒地凍嘅嚟黎壞,只有凍水無熱水,加上水力細,射水方向頭搖又尾擺,永遠要同啲同學爭best shower。其實唔只shower,連洗面盆都要大家一齊share。
5. 好記得當年英鎊匯率是1對16,算起來學費和生活物價也非常昂貴。現在英鎊匯率大幅下跌,Brexit後更一度跌穿10。
6. 90年代去英國讀書大部分學生也是乘搭國泰/英航/維珍客機,自從「中東三寶」出現後,今天不少學生乘搭Emirates/Etihad/Qatar,來回英國通常五千有找。
7. 當年讀boarding school每次放完假返英國都拎住兩大箱行李返,啲鬼仔就擺啲cricket bag和體育器材入trunk,我就擺啲百力滋和零食入個tuck box,望住張相啲回憶番晒黎!
8. Boarding school嘅老師和同學通常都係以surname嚟叫我們,每年總會遇到特別多Baker、 Worthington、 Creedy,就等於香港有好多陳同學,韓國就周街都係Kim一樣。
9. 當時的科技不及今天發達,掛住屋企人或者香港朋友都唔可以skype/whatsapp call/facetime,只可以入銀打。
10. 入銀打電話返香港貴到飛起,一鎊講得一分零鐘,差唔多成十幾蚊港紙,駁到同屋企人講得嗰幾句,講完又要再入錢,但當時一鎊已買到三條mars bar。
1. 無錢又急住打電話返香港時,就可以用Collect Call。只要打0800 89 1852去call centre,輸入對方的電話號碼,受話人接受後就可以開始通話,然後電話費就會由對方俾,呵呵。
12. 學校提供的食物大多是油炸食物和重複的menu,例如fish and chips、 jacket potato、roasted chicken、 baked beans。英國人大愛薯仔,除了焗薯,仲有炸薯條、烤薯粒、薯蓉…層出不窮。總之,除了薯仔都係薯仔。
13. 香港早期有一批新界人移居英國發展,他們在各地開餐館,賣唐餐。當你在天昏地暗的英國過寒冬,思鄉嗰陣就可以去當地酒樓食點心和廣東菜。時移世易,今日華人餐館已經愈來愈少廣東菜,取而代之的是川菜。
14. 依家英國愈來愈多中餐館開埋K房,極受中國留學生歡迎。音樂資料庫相當齊全,MV、純音樂版、現場伴奏版,通通都有,分分鐘仲update過香港的Neway。
15. 最鍾意就係落堂之後同一大班同學一齊喺common room食嘢傾偈,boarding school孖寶:芝士煙肉toasties,加杯milk簡直係當年人生最幸福嘅事。又或者同啲friend嚟個Pizza Night,一邊食pizza,一邊睇電視,仲chill過Netflix啊話你聽。
16. 我讀書嘅年代未有wifi,laptop亦未普及,而common room只有一部電視機,要同其他人share,所以好難會睇到自己想追嘅視劇。可能今日睇到《Top Gear》,又要唔知等到幾時先可以再睇。
17. 每間學校對不同年級的稱呼都唔同,有啲叫Year 9,有啲叫Year Upper 4,又有Lower 4,你永遠唔會知對方究竟係讀幾年級,好混亂啊!
18. 小食部係最令我留連忘返的地方,得閒就會去睇吓有無新出嘅糖果同朱古力,KitKat、Cadbury和Mars都係我最愛。