公司可愛的同事們除了關心世界大事外，還很在意本土新聞。而最近talk of the office是永遠靠得住的李錦聯師父決定暫別電視，離開那個陪住萬千師奶和上晝班同學成長的長壽節目都市閒情。
他們好擔心師父唔做，會換入一些沒有個性，或者不夠火喉的廚師。而且師父與大王的鬥氣場面，也是節目畫龍點睛之處。所謂一隻手掌拍唔響，留下大王一人，恐變成了獨臂的楊過，要日日dump心口懷念那些年和李錦聯的溫馨日子……
這對歡喜怨家，令我想起英國的Jamie OIiver與Gordon Ramsay。當然啦，兩對人有同有異。大王似乎唔太識煮飯，李錦聯師父亦未火爆到在節目講粗口。但Jamie和Gordon的恩怨，和大王與李師父的恩怨，則是相似得幾有趣。
圖片來源：food.ndtv.com
其實Jamie和Gordon的恩怨早在零九年時已經有跡可尋。Gordon曾在澳洲電視節目上嘲弄主持人的外表，二人的戰爭，由Jamie回應那一句（意譯）「哦～你死啦，咁口臭～澳洲人唔會原諒你架」引爆。
事件之後，Jamie和Gordon互相放箭攻擊，例如Gordon取笑Jamie是「大鑊飯達人」，煮飯只要所有材料落鑊就掂。Jamie也不甘示弱，表示要買cookbook一定揀Gordon太太Tana的，說兩公婆在廚藝的觸覺上差太遠咁話喎。
圖片來源：bustle.com
也難怪，兩人的風格相差甚遠，Jamie充滿boy next door陽光男孩的感覺，煮飯時隨心所欲，笑面迎人。主打菜式都好入屋容易處理，令師奶們都好受落。相反，Gordan長期處於超級撒亞人狀態，背脊有團火，對飲食要求極高。雖然Hell’s Kitchen都沒有誰未被他鬧過，但憑藉他摘下過的每粒米芝蓮星，又不得不佩服他。
爭咩吖，其實兩個都好正好好睇。不過，世上總要有這種鬥足一世的死敵，才能夠令自己一路精進。例如林丹和李宗偉、拿度和費達拿、大王和李錦聯。如果失去了無敵鴛鴦鏟，就真的靠不住了……
圖片：purepeople.com
文章作者為英識教育Britannia StudyLink 創辦人陳思銘Samuel Chan。