聞名世界嘅泰晤士河，除咗見證了英國歷史洪流嘅興衰，對兩間最高學府Oxford同Cambridge亦有一種特殊意義。
每年泰晤士河上最墟冚嘅Oxbridge Boat Race，最初其實源於兩個同樣叫Charles嘅同窗好兄弟；一個叫Charles Merivale，一個叫Charles Wordsmith。
兩個好兄弟在Harrow讀書時都是學校的板球手，惺惺相惜，後來分別升上劍橋同牛津。由於佢哋熱愛運動，時不時都會去劍橋康河切磋一下rowing，直到有次：
「喂，其實兩個人都係唔夠過癮。不如我哋兩間U各自湊夠八個隊員，搞大件事佢。」
「好，怕你呀！我哋就轉場去泰晤士河！」
因為一次忽發奇想，兩個Charles決定要分別以牛津和劍橋身份嚟一場划艇對決，各自組成學校史上第一隊uni sports team，劍橋仲向牛津正式下戰書挑機。呢兩個Charles應該無諗過一次貪玩，會造就兩間學校一個維持咗187年嘅傳統。
第一場男子八人Boat Race喺1829年舉行，當時幾乎牛津全校學生都湧去Henley-on-Thames河邊觀戰，但最後劍橋慘敗。由於比賽大受歡迎，之後1859年開始就變成Oxbridge年度比賽，仲移師去泰晤士河倫敦段，令整個比賽越鬥越大。
除咗兩次世界大戰，無嘢阻止到Oxbridge每年嘅rowing之戰。每年賽事都由前一年的敗方發戰書挑機。兩校rowing club各有千秋，劍橋贏82次，牛津贏79次，只有一次係平手。由2015年開始，第70屆女子八人賽艇亦改為與男子賽同日喺倫敦泰晤士河進行。而家每年賽事觀戰人數達25萬，河邊兩岸酒吧逼滿睇熱鬧的本地人，甚或專程來觀戰的遊客，另外每年有近二千萬觀眾坐係電視機前觀戰。
雖然現時Oxbridge學生活躍於各種運動項目，但其實牛津收生時不設sports scholarship，即使係運動員，也同樣要符合入學成績的門檻，劍橋亦一樣，絕對no excuse。精英之所以係精英，只因為佢哋夠all-rounded，無論讀書定係其他不同方面都懂得自己兼顧。佢哋有種精英嘅傲骨：今年輸咗咩，下年約定你再喺泰晤士河上砌過。
呢種，就係Oxbridge獨有嘅浪漫。
圖片: Telegraph