發達夢的夢

UK chitchat

article-no386

六合彩開一億半,口水由天花板流到落天花板。

 

每一個香港人,夠十八歲的多數幫襯過馬會,多數都係買六合彩,多數唔止一次。六合彩是香港人文化的一部分,是香港人小小的一個夢想。夢想可以發達,可以頭獎一注獨中,可以第二朝返工霸氣同老細講「You are fired!」然後隨便買張first class 單程機票去歐洲環遊世界,仲唔使擔心無樓住無收入,真正享受世界。

 

發一個發達夢?倒不如話,發一個發達夢的夢。我身邊就有一位朋友,期期都買六合彩,開六百萬又好金多寶一億半又好,一定買。「六百萬都可以買層樓住下吖。」講到真係會中咁。其實好多人,打從心底覺得自己一定唔會中,但都堅持要買,仲要上期一開即刻買下期。

 

「Samuel,你估我唔知咩。六合彩嘅魔力就係,明明你就無呢個命去中,但係期期都總有人會中,俾咗個希望你,令你覺得自己都有機會中,咁咪期期都買囉,電腦飛都係廿蚊。」但係買咗咁多年,最多都係中過40蚊,你唔會氣餒想放棄唔買咩?「唔會。你以為我買六合彩真係為咗啲錢咩。我夠知一定唔會中啦,我買六合彩係買嗰個發夢嘅時間。」咩夢?

 

「呢個夢犀利喇。由你塞張廿蚊入櫃枱,同姐姐講句『電腦飛吖唔該』開始發,發到開彩嗰刻先醒。每個人買完六合彩之後,一行出投注站就開始諗『吖,如果我中咗頭獎啲錢會點用呢』。不外乎即刻劈炮啦,買林寶啦,買凱旋門啦,買張first class機票去歐洲,單程。」聽到我都有啲流口水。

 

「最緊要最緊要,買樓。買一層自己住,我鍾意禮頓山,買層太古城送俾爸爸媽媽,佢地鍾意太古城間格。再買多兩三層收租,不過唔好買君臨天下,跌咗千幾萬。」好似好有道理。

 

然後佢又返嚟現實。「唉,其實我都知無咁易嘅,發達你話想發就發咩,發夢就得。不過呢廿蚊就係買呢兩三日嘅時間。發下夢一樣咁開心。」

 

彷彿代入了發達的situation,好像明白點解要期期買。六合彩的獎金,等於垂吊在白兔子前面的紅蘿蔔,白兔會追住蘿蔔,未必一定追到,但有一個願景,有一個目標。這個城市,好多人工作辛苦,朝十晚十為兩餐,倒頭來可能收入不過兩萬,夠俾家用夠生活不夠供樓。而六合彩有一種魔力,小小的夢想,為城市人大大的打氣。今日仲返緊工?唔緊要,買返注金多寶,真命天子可能係你。

 

在你有你勤力,我有我辛苦的香港,一些香港人需要的支持、動力,或許就是這一張未必會中的六合彩飛。這不是賭博,只是少少地買一個夢,發幾日夢,唔中的話又再出發。你可以話吹到六合彩咁大,可以話香港人要靠六合彩完夢是一種悲哀,但至少,it works。我相信幾乎每一個香港人都發過這發達夢的夢。

圖片:蘋果日報

您可能感興趣的文章