最近公司要搞裝修，是我們第一個五年計劃的第一炮。裝靚靚office，重新間位，加大空間，同事們有新鮮感，做得開心。（其實最要新鮮感的是我）
裝修是一門學問，尤其在寸金尺土的香港，要計準位攞到盡，間幾多間房，要不要pantry，前前後後開五六次會，同事們都難有定案。
「最緊要有pantry，依家食完飯洗餐具都無位！」－巴渣女同事M。
「reception緊要啲，家長嚟到頭顎顎唔知搵邊個」－男神男同事C。
「考試房同seminar space一定要分開，唔可以嘈到學生。」－super caring陳經理。
「仲有consultation room同interview room呢？呀，storage room都緊要，有冇室內washroom呀？」－sissy男同事L。
「零食架可唔可以搬遠啲？我入嚟之後肥咗十磅……」－完全不肥的女同事C。
「張枱好似太大，櫃桶啲位又唔好使。」－入職無耐的女同事T。
「Is it possible to have a gym room inside?」－大隻鬼佬同事P。
然後盡責的PA女同事V一路手忙腳亂寫低其他同事的意見。
負責打理家頭細務像公司管家的女同事J都好辛苦，一星期見幾間裝修公司，floor plan畫圖間房度位，全部一腳踢同師傅傾。
不得不配服師傅們的功架。
「嗱呢度最多間到10個工作位，老細房俾多半條柱你，七呎到啦。Pantry難少少，盡間，不過可能冇水喉到。」
「Wow，係勁嘅，呢啲咪專業知識囉。」我心諗。在香港這城市，各人有各人本份，有各自的責任和專業。無他，只是想抒情一下。見到同事們各自努力，有人為追夢，有人為生活，無論如何，那種集中精神全力以赴搏盡無悔的樣子都好可愛。想起幾年前，一班職場newbie，像天線得得B你眼望我眼不知做甚麼，走到今年，2016年，同事多了，學生多了，也到達了幾個里程碑。
開著這個公司裝修大會，好感慨。眼前的團隊，不知會在這條路上走得多遠，不知我們能再一同踏上多少個里程碑。但當你們仍在的時候，I just want to say a big thank you。今天的我們，少你一個都不行。